डेढ ड्रिम

मंगलघाट को पुल तरेर
उकालै उकालो
चिसो हावा खाँदै
पिपलडाँडा को चौपारी मा पुगेर
तिम्रो हात बाट चिसो पानी
पिउँदा का ति पलहरु
सम्झना बनेर
काली खोलाको मसानघाट बाट
ब्युझिएर आएको भुत ले झै
मेरो निन्द्रा तर्साइरहेको छ्

शायद तिमी र म
हामी हुन नसकेको पिडा
बाटोमा भेटदा पनि
मुन्टो बटार्नु पर्ने तिम्रो बाध्यता
म हिंड्ने गोरेटाहरु मा
आट्टिको झ्याल बाट चियाउने
तिम्रा नजरहरुमा
आजकल फुलस्टप लागेर होला
मलाई किलिकिली बाँडुली लाग्न छोडेको छ

तर पनि
किन हो खै
पूर्ण बिराम लागेका हाम्रा कथाहरुले
अझै पात्र खोजिरहेको जस्तो
या अझै लेखिन बाँकी अक्षरहरु बोकेर म
मसी सकिएको कलम जस्तै
पर्खिरहेको छु
दुई थोपा पसिना चुहाउदै
एक थोपा मसिको लागि
ता कि
बन्चरे ढुङ्गाको चौपारीमा पुगेर
लामो श्वास तान्दै
सोच्न सक्नेछु
जिबन मा तिमी धेरै माथि पुगे पनि
या म चिप्लिएर भुँईमा लढे पनि
तिमीलाई बेनी बजार मै हराएर
धेरै उकालो उक्लिसकेको छु
धेरै माथि ज्यामरुककोटको मन्दिर सम्मा
तिमी देखी धेरै टाढा !!